როტვეილერი

ისტორია.

როტვეილერი შინაური ძაღლის ჯიშია, რომელიც ასოცირდება გერმანიასთან. ძველად გერმანიაში როტვეილერს ყასბების ძაღლად მოიხსენიებდნენ რადგან მათი მთავარი ფუნქცია ნახირის მწყემსვა და ხორცით დატვირთული ურიკების ტარება იყო. ისინი ამ ფუნქციას 19-ე საუკუნემდე ითავსებდნენ, სანამ მატარებელი გამოჩნდებოდა. დღეს როტვეილერი კვლავაც გამოიყენება მეცხვარე ძაღლად, თუმცა მათ ახალი დანიშნულებაც მოეძებნათ და ისინი საკმაოდ კარგი მეძებარი, მაშველი, მცველი და პოლიციელი ძაღლები აღმოჩნდნენ.

მართალია როტვეილერი გერმანიასთან ასოცირდება, მაგრამ ამ ჯიშის წარმოშობის ადგილი ძველი რომის იმპერიაა. თუმცა ისინიც მენახირეებად იყენებდნენ როტვეილერებს. პოლიციელის როლი კი პირველი მსოფლიო ომის დროს შეითავსეს. მეორე მსოფლიო ომში კი როტვეილერები გამოიყენებოდა ისეთ სერვისებში, როგორიცაა კურიერი და დარაჯი.

ვიზუალური დახასიათება საერთაშორისო სტანდარტის მიხედვით

ზოგადი აღწერილობა

როტვეილერი არის საშუალო-დიდი ზომის მკვრივი კონსტრუქციის ძაღლი, რომელიც არც ზედმეტად მძიმეა, არც გამხდარი. მისი სწორი პროპორციები ხდის მათ მოქნილს, ძლიერს და მოხერხებულს.

ხასიათი და ტემპერამენტი

ძირითადად არის მშვიდი, ბავშვებისადმი კეთილგანწყობილი, დამჯერი. არის თავდაჯერებული, გაწონასწორებული. გარემოზე რეაგირებს სიფრთხილით.

თავი

თავის ქალა

გრძელი აქვს, ყურებს შორის მანძილი განიერია. შუბლი ამობურცული აქვს. სტოპი გამოკვეთილი.

ცხვირის წვერი კარგად განვითარებული აქვს, უფრო განიერი ვიდრე მრგვალი. შედარებით ფართე ნესტოებით. ყოველთვის შავი პიგმენტაციით. დრუნჩი საშუალო ზომისაა. ტუჩები – შავი და კუთხეები ერთმანეთთან ახლოსაა. პირის ღრუ არ  ჩანს. ყბები ძლიერი და მასიურია, კბილებიც ძლიერია, სულ 42. თანკბილვა მაკრატლისებური. თვალები საშუალო ზომის, ნუშის ფორმისაა. შეფერილობა – მუქი ყავისფერი. ყურები საშუალო ზომის, ჩამოყრილი, სამკუთხედი ფორმის, ფართოდ და მაღლა დასმული.

კისერი

ძლიერი, ზომიერად გრძელი, კარგად განვითარებული კუნთებით, ოდნავ მოხრილია.

ტანი

ზურგი – სწორი, ძლიერი.

წელი – მოკლე, ძლიერი და ღმრა.

გავა – განიერი, საშუალო სიგრძის, არაბრტყელი, არ აქვს დაშვება.

მკერდი – განიერი და ღრმა.

მუცელი – ზომიერად აკრული.

კუდი – ბუნებრივად ზედა ხაზზე ატარებს, მოსვენების პერიოდში შეიძლება იყოს დაკიდებული.

ზომები და წონები

მინდაოში სიმაღლე 56-57 სმ არის პატარა, 58-59 სმ საშუალოა, 60-61 იდეალური ზომაა, ხოლო 62-63 სმ ძალიან დიდია. წონა დაახლოებით 42 კგ.

ბეწვი

აქვს თივთიკი. საშუალო ზომის ბეწვი, უხეში, გლუვი და ხშირი, არ უნდა ჩანდეს თვითიკი. ბეწვი უკანა კიდურებზე უფრო გრძელია.

ფერი – შავი, კარგად გამოკვეთილი, რუჯი ღაწვებზე, დრუნჩზე, ყელზე, მკერდზე და ფეხებზე. ასევე ორივე წარბზე და კუდის ქვეშ.

კიდურები

წინა კიდურები – სწორი და პარალელურია, იდაყვი მიკრულია სხეულზე. კიდურების სიგრძე მინდაოში სიმაღლის ნახევარია. მტევანი ძლიერი და ფართო.

უკანა კიდურები – სწორი და პარალელურია, მკვეთრი კუნთოვანი მენჯის სარტყლით. კარგად განვითარებული მუხლით და სახტომი სახსხრით.

თათები – მრგვალი ფორმის, საშუალო ზომის, შეკრული თითები და მუქი ბრჭყალები.

იხილეთ ერთ-ერთი საუკეთესო მონადირის ჯიშის წარმომადგენელის დახასიათება ამ სტატიაში