ალოპეცია

რა არის ალოპეცია

ალოპეცია ნიშნავს სხეულის მცირე უბნებში ბეწვოვანი საფარველის პათოლოგიურ ცვენას. ის შეიძლება იყოს როგორც დამოუკიდებელი დაავადება, ასევე სხვა დაავადების ერთ-ერთი სიმპტომი. მისი მკურნალობა სხვადასხვა გვარია და დამოკიდებულია გამომწვევ მიზეზზე, ამაზე უფრო ვრცლად ქვემოთ ვისაუბრებთ.

ცვენა შეიძლება გამოწვეული იყოს კანის მთლიანობის დარღვევით, ან ქავილით, ასევე კანის დაავადებებით, რაც თავის მხრივ შეიძლება გამოწვეული იყოს პარაზიტებით, ბაქტერიებით, ალერგიებით და ა.შ. თუმცა პრობლემა შეიძლება გამოწვეული იყოს გენეტიკითაც.

მიზეზები

ალოპეციის გაჩენის მიზეზები იყოფა ორ კატეგორიად: თანდაყოლილი და შეძენილი. ზოგიერთ შემთხვევაში ჩვენ ზუსტად ვიცით ალოპეციის გამომწვევი მიზეზი და რა დაავადებასთან გვაქვს საქმე, ზოგ შემთხვევაში კი მიზეზის დადგენა შეუძლებელია. განვიხილოთ ალოპეციის რამდენიმე, ყველაზე ხშირი ფორმა.

ფოლიკულური დისპლაზია

ეს არის ალოპეციის ტიპი, რომელიც დამახასიათებელია ზოგიერთი ჯიშის ძაღლისთვის. ასეთი სახის ალოპეცია განპირობებულია გენეტიკით და იშვიათად ხდება განკურნება.

ინექციის შემდგომი ალოპეცია

ზოგიერთი ინექციის შემდეგ ცხოველებს ინექციის ადგილზე  უვითარდებათ ალოპეცია. ეს შეიძლება მოხდეს ცოფის ვაქცინის ან სტეროიდების ინექციის შემდეგ, რასაც მოყვება კანის ანთება და შემდეგ იწყება თმის ცვენა.

თმის ცვენა გრუმინგის შემდეგ

ზოგჯერ ცხოველის გადაპარსვისას არის შემთხვევები, როცა კონკრეტულ ადგილას ბეწვი აღარ იზრდება, თუმცა ალოპეციის ეს მიზეზი დაუდგენელია.

ტიპიური თმის ცვენა

ამის მიზეზიც უცნობია და ემართება ზოგიერთი ჯიშის ძაღლს, მაგალითად ტაქსას.

დაჭიმული თმა

ბევრ მეპატრონეს მოსწონს ვარცხნილობის გაკეთება და თმის აწევა რეზინებით, თუ ზედმეტად დიდხან და ხშირად იქნება თმა დაჭიმული, ამ ადგილებში ალოპეციის განვითარების შანსი მაღალია.

ალოპეციის მიზეზი ასევე შეიძლება იყოს ცხოველის პარაზიტები როგორიც არის ტკიპა ან რწყილები. ალოპეცია შეიძლება გამოიწვიოს ალერგიამ საჭმელზე, ასევე ბაქტერიულმა ან სოკოვანმა ინფექციებმა, ზოგიერთმა სიმსივნემ და სეზონურმა დაავადებებმაც კი.

დიაგნოსტიკა

თმის ცვენის აღმოჩენის შემთხვევაში, უნდა მიმართოთ ვეტერინარს, რომელიც შეეცდება რომ დაადგინოს  გამომწვევი მიზეზი. დიაგნოსტირება ხდება დათვალიერებით და ანამნეზის შეგროვებით. დამატებითი კვლევის სახით შესაძლოა დაინიშნოს სისხლის ანალიზი, ბიოფსია ან კანის ანაფხეკის გამოკვლევა.

მკურნალობა

მკურნალობა დამოკიდებულია თუ რა მიზეზით არის გამოწვეული ალოპეცია. ზოგ შემთხვევაში შეიძლება დაინიშნოს ანტიპარაზიტული წვეთები,  ანტიბიოტიკები, სოკოს საწინააღმდეგო ან სხვა წამლები, რომელიც მოაგვარებს იმ პრობლემას , რომელიც იწვევს თმის ცვენას.  თუ ალოპეციის მიზეზი არის გენეტიკური ამ შემთხვევაში განკურნება ვერ მოხდება.

გადამდებია თუ არა ალოპეცია?

კონკრეტულად ალოპეცია გადამდები არ არის. მაგრამ თუ ის გამოწვეულია პარაზიტებით ან სოკოვანი დაავადებებით, ამ შემთხვევაში გადამდები სწორედ გამომწვევი მიზეზი და არა ბეწვის ცვენა.