ბაბეზიოზი, იგივე პიროპლაზმოზი არის დაავადება, რომელიც ჯანმრთელ ცხოველს გადაეცემა უმარტივესი პარაზიტით დაინფიცირებული ტკიპის კბენის შედეგად. უმარტივესი პარაზიტი – ბაბეზია – ორგანიზმში მოხვედრის შემდეგ შეაღწევს წითელ უჯრედებში (ერითროციტებში) და იწვევს ანემიას. ბაბეზიოზი ასევე გადაეცემა დაავადებული ძაღლიდან ლეკვებს მუცლად ყოფნის დროს.

დაავადების მიმართ ყველაზე მიდრეკილნი არიან ცხოველები, რომლებიც დროულად არ იღებენ ანტიპარაზიტულ პრეპარატებს, ან ცხოვრობენ ისეთ გარემოში, სადაც მრავლად არის ტკიპები.

ჯანმრთელი ცხოველი ბაბეზიოზით ასევე შეიძლება დაავადდეს დაინფიცირებული ცხოველის სისხლის გადასხმის, ან ასეთ ცხოველთან შეხებაში მყოფი, არასტერილური ქირურგიული ინსტრუმენტებით.

დაავადებული, ან დაავადება გადატანილი ცხოველის მიერ ჯანმრთელი ცხოველის, ან ადამიანის დაინფიცირება ხდება შემდეგნაირად. ტკიპა კბენს დაავადებულ ცხოველს, და იღებს დაინფიცირებულ სისხლს, შემდეგ კი ჯანმრთელ ცხოველზე შეტევისას ტკიპის ორგანიზმში მოხვედრილი პარაზიტები გადადის ჯანმრთელი ცხოველის / ადმიანის ორგანიზმში.

კლინიკური ნიშნები

კლინიკური ნიშნები საკმაოდ მრავალფეროვანია, ასევე სხვადასხვაგვარია მათი მიმდინარეობის სისწრაფე და სირთულე. ისინი შეიძლება მიმდინარეობდეს მწვავედ, ქვემწვავედ, ან ქრონიკულად.

ყველაზე ხშირად ბაბეზიოზი ძაღლებში გვხვდება მწვავე ფორმით, რომელსაც ახასიათებს მუქი შარდი, მაღალი ტემპერატურა, სისუსტე, გაღიავებული ლორწოვანი გარსები, დეპრესია, შეშუპებული ლიმფური კვანძები და ელენთის გადიდება. შარდის და სისხლის ანალიზში ჩანს ანემია, თრომბოციტოპენია, ჰიპოალბუმინემია, ბილირუბინურია.

ზემოთ ჩამოთვლილი სიმპტომების გარდა, დაავადებულ ცხოველს ასევე შეიძლება აღენიშნოს ანორექსია, დეჰიდრატაცია, ღებინება, დიარეა, ატაქსია, ასციტი, კუნთების ტკივილი, შეშუპება; სისხლი შარდში; სისხლდენა ცხვირიდან;

როგორ ისმება დიაგნოზი?

დიაგნოზის დასმა ძველად სისხლის სინჯის მიკროსკოპული კვლევით ხდებოდა. სინჯში ეძებდნენ პარაზიტს და მისი აღმოჩენის შემთხვევაში დიაგნოზი დასმული იყო, თუმცა დროთა განმავლობაში კვლევის მეთოდოლოგია შეიცვალა. დღეს ბაბეზიოზის დიაგნოსტირება ხდება სწრაფი ტესტის, ან ელაიზას აპარატით.

მკურნალობა

აუცილებელია, რომ პიროპლაზმოზის მკურნალობა დანიშნული იყოს ექიმი ვეტერინარის მიერ. სამკურნალოდ გამოიყენება ანტიპროტოზოული პრეპარატები, ასევე მიმართავენ კომპლექსურ და ანტიბიოტიკურ მკურნალობას. ანემიის სამკურნალოდ გამოიყენება სისხლის გადასხმასაც.

პროფილაქტიკა

იმის გამო რომ ეფექტური ვაქცინაცია არ არის ბაზარზე, პროფილაქტიკური ღონისძიებები უნდა იყოს მიმართული ცხოველის მკბენარებისგან დაცვისკენ, რაც გულისხმობს სისტემატურად ანტიპარაზიტული პრეპარატების გამოყენებას, რომლებიც მოქმედებს ტკიპების წინააღმდეგაც. პრეპარატები გვხვდება წვეთების, აბების და ყელსაბამის სახით. ლეკვებისთვის და კნუტებისთვის არსებობს უსაფრთხო  ანტიპარაზიტული სპრეი.